N11 დაწესებულებაში ქუჩის კალათბურთის მატჩი ჩატარდა
სასჯელაღსრულებისა და პრობაციის მინისტრის მოადგილე ზვიად მიხანაშვილი და სპორტისა და ახალგაზრდობის საქმეთა მინისტრი ტარიელ ხეჩიკაშვილი N11 არასრულწლოვანთა სარეაბილიტაციო დაწესებულებაში მსჯავრდებულებს შორის გამართულ ქუჩის კალათბურთის მატჩს დაესწრნენ.

ღონისძიებას სპორტისა და ახალგაზრდობის საქმეთა სამინისტროს სსიპ "ბავშვთა ახალგაზრდობის ეროვნული ცენტრის" ხელმძღვანელი გიგა გაბელაია ესწრებოდა.

მატჩის დასრულების შემდეგ "ბავშვთა ახალგაზრდობის ეროვნული ცენტრის" ხელმძღვანელმა გიგა გაბელაიამ მსჯავრდებულებს საჩუქრად სერთიფიკატები და თასები გადასცა. მსჯავრდებულებს ცენტრისგან საჩუქრად ტელევიზორები, ფეხბურთისა და კალათბურთის ბურთები გადაეცათ.

სპორტული ღონისძიება ბავშვთა და ახალგაზრდობის ეროვნული ცენტრის პროექტის "CYNC სპორტი ბარიერების გარეშე" ფარგლებში ჩატარდა.

სპორტული აქტივობები სასჯელაღსრულებისა და პრობაციის სამინისტროს სხვადასხვა პენიტენციურ დაწესებულებაში რეგულარულად ხორციელდება და მიზნად მსჯავრდებულთა რეაბილიტაცია-რესოციალიზაციასა და ცხოვრების ჯანსაღი წესის პოპულარიზაციას ისახავს.

სპორტისა და ახალგაზრდობის საქმეთა მინისტრის ტარიელ ხეჩიკაშვილის განცხადებით, დაწესებულებაში მსჯავრდებულებს განსაკუთრებული სიყვარული აქვთ სპორტის მიმართ.

"აქ საუცხოო პირობები აქვთ და ყველაზე მთავარი ის არის, რომ თითოეულ ამ ბავშვს აქვს იმის შეგრძნება, რომ ძალიან მალე დაუბრუნდება ოჯახს გარკვეული პროფესიით, ცოდნით და უნარებით," - განაცხადა ტარიელ ხეჩიკაშვილმა.

სასჯელაღსრულებისა და პრობაციის მინისტრის მოადგილე ზვიად მიხანაშვილმა არასრულწლოვანი მსჯავრდებულებისათვის სპორტული ღონისძიებების მნიშვნელობას გაუსვა ხაზი.

"სასჯელაღსრულებისა და პრობაციის სამინისტრო აქტიურად თანამშრომლობს სპორტისა და ახალგაზრდობის საქმეთა სამინისტროსთან. რა თქმა უნდა, სპორტული აქტივობები ძალიან მნიშვნელოვანია. განსაკუთრებით, არასრულწლოვნებთან მიმართებაში. მსგავსი ღონისძიებები დიდ სტიმულს აძლევს მათ, საზოგადოებაში სრულფასოვანი ინტეგრაციის გზაზე,"- აღნიშნა ზვიად მიხანაშვილმა.

ღონისძიება სასჯელაღსრულებისა და პრობაციის სამინისტროს ორგანიზებითა და სპორტისა და ახალგაზრდობის საქმეთა სამინისტროს სსიპ "ბავშვთა ახალგაზრდობის ეროვნული ცენტრის" მხარდაჭერით განხორციელდა.



FaceBook Twitter Google